ИДНИНА

Сакам твоја крв да тече низ мене,

Твоја челад,

Твои рани во моето срце,

Твоја болка во мојата душа.

Сакам да дишам за тебе.

Умирам, цело минато умира за тебе.

Нов универзум, нова јас,

Наше семе сееме,

Наши сни живееме.

Те сакам тебе,

Нè сакам нас.

Утре е нов ден, нова надеж.

Со тебе - секогаш е утре.

ТРАЧ РУБРИКА

И што да кажам?

Сите сакаат да чујат нешто,

нешто актуелно, интересно, возбудливо.

Ама што?

Што би ви ја нахранило

љубопитноста, суетата, егото?

Комплимент - ама лажен,

восхит - ама неискрен,

трач - исто лажен?

Не.

Немам јас од тие приказни

кои полнат нечии уши и души.

Имам само една, мојата.

Ако си мој и ти си дел од неа,

а ако не си, не заслужуваш ни да ја чуеш.

Викај ме себична, слободно.

Оговарај ме со лажните другарки - слободно.

Па и колни ме, слободно.

Додека јас живеам за себе

Ти проживуваш крај мене

Слободно.

ТЕАТАР

Не сакам бе!

Не сакам да престанам да живеам.

Сакам да боли, да гребе.

Сакам бури и дождови,

немирни ноќи, снежни утра,

детска насмевка и надеж.

Не сакам да чекам.

Сакам се’, тука и сега.

Да живеам со полни гради,

да фантазирам, да остварам.

Ризик, сакам ризичен чекор

кон бездната на заборавот,

кон небесната иднина.

Сонце да ме оплакува,

дожд да се радува за мене.

За тоа живеам, за театар,

овој ден е мојата сцена.

Аплауз молам!

За младешката ревност

во веќе остареното срце.