ФЕМИНИСТКА

   Често пати наидувам на разговори на темата „Разликата маж-жена“. Кој што може, што не може? Работата, обврските, облеката, дури и боите - се делат на машки и на женски. Уште од мали знаеме дека розевата боја е за девојчиња, а сината за машки. Но, дали сите го прават тоа? Дали секогаш и секаде се делиме на мажи и жени? Дали и колку сме феминистки? Дали во секоја од нас има, барем малку, феминистка? Или учени сме дека сме женски, понежен пол и не можеме да направиме некои работи. Не, можиме скоро сè, но од раѓање сме учени така и тоа ни влегува потсвесно во начинот на живот. А мора да признаете неретко и играме на оваа карта затоа што ни одговара да глумиме кревки, нежни беспомошни. Чист мазохизам. Еднаш некој паметен човек(маж!) рекол - „Не знам зошто се трудите да бидете еднакви со нас мажите кога вие секогаш сте подобри од нас. Едноставно е нелогично“. Да се разбериме сум феминистка, но во истовреме страшно многу ги поддржувам мажите (знам, нема логика). И се трудам да ги разберам. Посебно оние послабите од мене. Не се тие виновни. Не секој маж се раѓа за да биде - висок, убав, миленик на жените - мажиште. И не секоја жена се раѓа за да биде - висока, убава, заводничка - жениште. А, тоа што некои жени си имаат замислено дека како „понежен“ пол имаат право да го злоупотребуваат тоа на секој можен начин, е друг и пораспространет проблем. Дури ни ова „понежен“ некако не се вклопува во она што за мене е жена - во вистинска смисла на зборот. Поправете ме ако грешам но, повеќепати го имам слушнато изразот „поубав пол“. Ни ова не е 100% точно, но звучи поубаво и повистинито.

  Мора да признаеме, сè уште некаде има семејства во кои жената нема никакви права. И меѓу нас ги има. Но, од друга страна, оние што понекогаш сакаат да „глумат“ модерна, феминистички настроена Јованка Орлеанка најчесто се оние кои би се оправдале дека не можат да направат нешто само затоа што се жени. А, ние, ’вистинските’ феминистки - немаме време за тоа. Зафатени сме работејќи рамо до рамо со нашите браќа и татковци. Наместо со протести и слогани - практично, на дело, им докажуваме што сме и што можеме. Добиваме возачки дозволи, сами си одбираме брачни партнери, што ќе облечеме, што ќе учиме и што ќе работиме. И наоѓаме некој кој ни купува цвеќе секој ден - не само на осми март, кој нè почитува секогаш и не само за на Инстаграм. Не е до мажите или до општеството. До нас е.

   Поздрав од една феминистка која „ужасно многу“ ги почитува мажите.